பல நூற்றாண்டுகளுக்கு முன்னர் தமிழகத்திலுள்ள சிதம்பரத்தில் பெருவெள்ளம் ஏற்பட்டு பயிர்கள் அழிந்து அதனால் கொடிய பஞ்சம் விளையவே மக்கள் உயிர்வாழ பல இடங்களை நாடி புறப்பட்டனர். சிதம்பரத்திலுள்ள வீரசைவ வேளாள மன்னாடியார் வகுப்பை சேர்ந்த மூன்று தாய்வழி குடும்பத்தினரும் புறப்பட்டனர். மூன்று குடும்பத்தினரும் சேர்ந்தே வழிநடந்தனர். வழிநடைக்கான சில பொருட்களை கொண்ட மூடை ஒன்றை ஏந்திய அவர்கள் பனை ஓலைக்குடைகளையும் பிடித்து நடந்தனர். வழியில் தங்கள் குலதெய்வமான மதுரை மீனாட்சி அம்மனை மதுரைக்கு சென்று தரிசித்தனர். ஒரு பக்தன் ஒரு கல்லை எடுத்து அம்மனாக மனதில் உருவகம் கொண்டு தன்னுடைய மூடையில் வைத்துக் கொண்டான். நடந்தே சென்று அவர்கள் கேரள மாநிலத்திலுள்ள பாலக்காடு மாவட்டத்தைச் சேர்ந்த பல்லவசேனா என்ற கிராமத்தை அடைந்தனர். சிதம்பரத்தில் வைர வியாபாரிகளாக சிறப்புற்றிருந்த அக்குடும்பத்தினர் பல்லசேனையில் வாணிபம் செய்து நல்ல முன்னேற்றம் அடையும் மனம்கொண்டனர். செயலில் ஈடுபட்டு ஏராளமான சொத்துக்களையும் சம்பாதித்தனர். அவர்களில் ஒருவர் வாணிபத்திற்காக எங்கு செல்வதாக இருந்தாலும் அதற்கு முன்னர் தங்கள் குலதெய்வமான மதுரை மீனாட்சி அம்மனை மதுரைக்கு சென்று வணங்கிய பின்னரே செல்வது வழக்கமாக கொண்டிருந்தார். ஒருமுறை மதுரைக்கு செல்ல முற்பட்ட அவள் குளத்தில் குளிக்க இறங்குவதற்கு முன் பொருள் நிறைந்த மூடையையும், பனைஓலை குடையையும் சிறிது நேரம் பாதுகாத்தும்படி அங்கு மாடு மேய்த்து கொண்டிருந்த இரண்டு சிறுவர்களிடம் கேட்டுக் கொண்டார். தமக்கு முதுறை வந்துள்ள அப்பெரியவருக்கு திடீரென ஒரு எண்ணம் தோன்றியது. வயதாகி விட்டதால் நெடுந்தூரம் நடந்து சென்று மதுரை மீனாட்சி அம்மனை காணமுடியாத நிலை ஏற்படுமோ என வேதனையுற்றார்.

பக்தியோடு அம்மனை நினைத்து தன் இயலாமையை கருதி கலங்கியபடி குளித்து முடித்தார். சிரமத்துடன் மீண்டும் பயணத்தை தொடர நினைத்து குடையையும் மூடையையும் எடுக்க முற்பட்டார். குடையை எடுக்க முடியவில்லை. பெரியவர் அஞ்சி நடுங்கினார். இதுபற்றி காரணமறிய ஜோதிடரை அணுகினார். மதுரை மீனாட்சி அம்மனே அங்கு குடிவந்துள்ளதாக ஜோதிடர் வாயிலாக அறிந்தார். இந்த தகவல் சுற்றுவட்டாரத்தில் பரவியது. குடையில் அம்மன் குடியிருந்த காரணத்தால் அந்த இடத்திற்கு அன்றுமுதல் குடமந்து என்று சிறப்பு பெயர் சூட்டப்பட்டது. குடமந்து தோன்றி சுமார் 400 ஆண்டுகளுக்கு பின்னர் மீன்குளத்தி அம்மன் கோயிலும், நான்கு ஏக்கர் நிலத்தில் குளமும் உருவாக்கப்பட்டது. பக்தரான அந்த வியாபாரியின் நினைவாக ஒரு திருமந்திரம் அமைக்கப்பட்டுள்ளது.